Hún er trunta um truntu frá truntu til truntu....eða ehakki...

Vá hvað ég er ekki að nenna því að fara niður, setja í þvottavél, ryksuga, versla í matinn eða neitt annað en því miður þá neyðist ég til að gera eitthvað af þessu. Væri nú kannski of mikið að gera þetta allt í einu :) Á morgun eigum við mæðgur tíma í klippingu, Katla er orðin eins og lítið tröllabarn, en spurning hvernig hún kemur til með að láta, er ekkert of hrifin af því að verið sé að fikta í hárinu á sér. Ég ætla að láta breyta mér vil ekki lengur vera Erna og er að spá meira í kannski Obama væri það ekki kúl, dökkhærð, stutt en samt með smá krullur...mér finnst Obama æði.

Ég er að borða nammi, reyndar vont nammi en ég keypti það og það er ekkert annað til svo ég ét það, það er kreppa og þá hendir maður engu ekki einu sinni því sem er skemmt eða vont. Svona getur þetta nú verið leiðinlegt, en að sleppa því neinei það er ekkert inni i myndinni:) Elska nammi:) Ég drekk ekki, reyki ekki en ég borða nammi og tygg nikótíntyggjó á köflum aðra ósiði hef ég ekki sem eru óhollir já sæll. 

Sé það núna að ég er í náttbuxunum mínum á röngunni haha þokkalega sem maður er klikk. En þær eru jafnnothæfar á þeirri hliðinni. Vinnan fer brátt að taka völdin aftur og er ég farin að hlakka til bara að komast aftur til kjellanna minna. Vinavika í vinnunni að byrja sama dag og ég kem þannig að jibbí jei og það eina sem ég veit er að ég á að vera ofsalega góð við einhvern í vinnunni.

Veit ekki hvort ég á að koma með einhverja speki, ef ég geri það er bara bjallað í mig og mér bent á að sú færsla sé frekar óviðeigandi, sumir sem halda að þeir séu bloggeftirlitsmenn. Er ég eitthvað umdeild þessa dagana, svei mér og það sem meira er er það að mér finnst það bæði fyndið og svo er mér alveg sama.

O-sjúlli kveður múnandi á liðið 

 

Pælingar........

Andlaus, aldrei þessu vant þá veit ég ekki um hvað ég á að röfla. Það er eitthvað nýtt er það ekki. Hef samt þörfina fyrir að tala get endalaust talað nema ég sé stoppuð af

Fór á nammirúnt með stóra barninu mínu áðan, ýmislegt sem mig langaði að segja við hana og fékk auðvitað munnræpu held hún hafi ekki heyrt helminginn en við fengum samt nammi afþví að við erum svo sætar. Litla barnið mitt sefur hérna við hliðina á mér, agalega róandi að hlusta á hana anda. Ég elska báðar stelpurnar mínar út af lífinu og svo á ég helming í einni enn sem reyndar býr í Svíþjóð getur maður verið heppnari en það, held ekki.

Mér var bent á það ekki alls fyrir löngu að víkka hjá mér sjóndeildarhringinn, eflaust hafa allir gott af því en ætli maður geti víkkað hann of mikið? Ég held það að maður geti víkkað hann svo mikið að maður missir í raun sjónar á því eftir hverju maður var að slægjast (flott orð). Getur maður ekki orðið svo OF niðursokkinn í eitthvað að maður gleymir öllu öðru.

Þegar ég umgengst fólk er ég mjög fljót að finna hverjir hafa góða nærveru og hverjir ekki. Mamma sagði mér að þegar ég var lítil hefði hún tekið eftir því að sumt fólk forðaðist ég. Er svona enn í dag, fólk túlkar þetta eins og mér sé illa við það en svo er ekki, en mér finnst mjög óþægilegt að vera nálægt fólki sem mér finnst hafa slæma nærveru, þetta getur verið alveg ágætis fólk bara ekki fyrir mig.  Var að lesa um sporðdrekann og þar stendur "sporðdrekinn er innhverfur á þann hátt að hann skynjar það sem öðrum er hulið, hann sér í gegnum yfirborðsmennsku. Öðrum merkjum fremur skynjar hann veikleika fólks, neikvæðni í andrúmslofti og það sem aðrir eru að fela" Segi nú ekki annað en sællllll.....

Ég er sögð vera ekta sporðdreki og ég held ég sé það. Get verið góð held ég, get verið mjög slæm og hefni mín illa. Á til að vera mjög kaldhæðin án þess kannski beint að ætla mér það.

En ég er auðvitað æði engu að síður

O-sjúlli kveður og slengir til halanum 

Þreyta

Er hálfsofandi hér, get samt ekki sofið. Svaf illa í nótt koma alveg þannig nætur stundum. Þarf að gera svo margt í dag sem ég nenni ekki en verð samt að gera. Fer í það þegar ég verð búin með eins og 10 bolla af kaffi, einn búinn níu eftir.

Katla fór í fyrsta skipti í viku á Bubbakot áðan. Gott að fá smá rólegheit út af fyrir sig. Líður ágætlega þegar ég er ein, það þurfa allir að vera einir stundum. Fer að vinna á mánudaginn vona að fæturnir geri sig. Var verið að bjóða mér nýtt starf í heimahjúkrun sem þýðir að ég þarf ekki að ferðast um allan bæinn heldur tek að mér að sjá um tvær öldrunarblokkir hér í bæ, verð þar með viðveru og baða þá sem þess þurfa þar og skipti á sárum og bara allt mögulegt, gæti verið gaman. Missi reyndar bílastyrkinn og munar nú um hann á mánuði en mér býðst kannski hærra vinnuhlutfall í haust þegar Katla fer á leikskólann þannig að það verður fínt. Ætla allavega að prófa þetta, fer á deildarfund á föstudag þar sem þetta verður rætt betur.

Mikið að gerast í kollinum á mér, svolítið fárviðri en hver hefur ekki gott af því stundum, allavega ef það lægir fyrir rest. Sumir eru alltaf með fárviðri, svo eru sumir sem geta aldrei sætt sig við neitt og vilja alltaf eitthvað annað, meira og betra. Þeir vita ekki hvað málshátturinn "enginn veit hvað átt hefur fyrr en misst hefur" þýðir. Ég veit hvað hann þýðir og það er mikið til í honum.

Áttaði mig á því í gær að ég hef ekki farið upp að leiðinu hennar mömmu síðan á aðfangadag. Ég skammast mín fyrir það, ætla að fara í dag kannski.  Búið að dreyma hana af og til síðustu vikurnar, einn draumur sem mig langar til að fá útskýringu á, svolítið skrýtinn.....

Ætla að hætta í bili og fara að hvíla mig smá

O-sjúlli kveður í draumaheimi 

Skítur á skít ofan

Styttist í að ég ætli að búa mér til nýtt blogg, afhverju? Svar: Bara...Fullt af fólki sem les hér alltaf en kvittar aldrei. Veit af kjarna sem kemur alltaf hingað og þeim er fyrirgefið fyrir að kvitta ekki en svo kemur fólk hér sem ég þekki lítið sem ekkert og getur ekki einu sinni kvittað fyrir sig, en virðist vita allt hvað er að gerast og er jafnvel að ræða það við Eyþór. En nóg um það..

Fór með Kötlu til læknis og þurfti að bíða í 1 1/2 tíma þokkalega sem mín litla með háa hitann sinn var orðin pirruð. Hilmir doktor greindi hana með mjög slæma hálsbólgu og ekkert skrýtið þó svo að ég hafi þurft að sofa með hana sitjandi í alla nótt greyið litla, þannig að enn og aftur er hún komin á sýklalyf eða svo sem ekkert enn og aftur en í annað skipti á einum mánuði. Vona að þetta fari að taka enda er að vera ofsalega þreytt sjálf enda búin að vera með hana alein hérna hundlasna núna í 5 daga og er ekkert sjálf orðin góð í fótunum mínum, stanslausir verkir..en svona er lífið.

Skaust aðeins til Elínar sys í vinnuna áðan og þá var hún búin að prjóna svo fallegan ullarskokk á Kötlu alger dúlla. Set hana í hann strax á morgun. Sjálf ætla ég að fara að prjóna mér ermar þægilegt svona á kvöldin og eins þegar maður er á kvöldvöktum sem ég hugsa að ég fari á aftur í framtíðinni einhvern tímann allavega. 

Viss þáttaskil að verða hér á heimilinu sem verða auglýst síðar þeim sem það koma við. Deyið bara ekki úr forvitni þeim verður tilkynnt það sem við kemur.

Lítið að segja svo sem, ætla ekki að skrifa meira núna læt þetta nægja en skrifa líklega á öðrum vettvangi næst og mun senda þeim sem ég þekki og vil að lesi slóðina að þeirri síðu, en aldrei að vita nema ég setji hérna inn eitthvað aftur sé til með það.

O-sjúlli kveður  

McDreamy..................:)

Ég enn á ný veit ekki hvað á að skrifa í fyrirsögn. Finnst þessi fyrirsögn asnaleg..segi nú ekki annað. Hálfótalaus í dag eftir gærdaginn. Byrjaði á að fara upp í íbúð kl 8 og laga til það sem átti eftir og Eyþór að laga ljós, síðan að ganga frá því drasli sem var eftir. Fá gaurinn sem ætlaði að leigja til að taka draslið sitt. Fara með Byggð upp í íbúð að taka myndir fyrir söluskrána. Kl 19 upp í íbúð að reyna að fá gaurinn til að taka draslið sitt, gekk ekki mótþróalaust fyrir sig. Sá sem leigir kom svo kl 20 og tók við íbúðinni, ég var svo búin á því að ég endaði á því að gefa honum ryksuguna hefði ekki orkað að ganga með hana út í bíl..púff þannig að íbúðina leigðist og skráðist á sölu í gær og ég er bara sátt við það. Á reyndar eftir að fara og taka dót sem ég laumaði í þvottaherbergið en geri það á mánudag þegar ég fæ lyklana hjá Elínu sys:)

Katla rauk allt í einu upp í hita í gær og var hundlasin í nótt og framanaf degi en held hún sé að ná þessu úr sér, búið að vera að ganga í bænum en ég vonaði að hún slyppi en þegar 7 af 10 börnum fá þetta í einu eru litlar líkur á því að hún sleppi haha..sitjum núna og borðum Bugles og svala, horfum á Dýrin í hálsaskógi og  lífið er sko gott.

Þórunn H vinnufélagi minn kom í heimsókn til mín í gær þessi elska og færði mér helling af spennandi lesefni. Var að lesa bókina "þar sem vegurinn endar" eftir Hrafn Jökulsson og hún er góð, fyndin á köflum og lýsir lífi fólksins í Stóru-Ávík á Ströndum, hefði nú líklega aldrei keypt mér þessa bók eða tekið hana á bókasafninu en fyrst hún var komin upp í hendurnar á mér las ég hana:) Er svo að lesa núna strákurinn í röndóttu náttfötunum og hún lofar góðu...

Búin að liggja yfir Grey´s Anatomi síðan ég fór í aðgerðina og búin með seríu 2 sem ég gaf Brynju í jólagjöf og vantaði að fá hinar 3 lánaðar og þar sem enginn í kringum mig átti þær þá ákvað ég bara að gerast djörf og pantaði alla helvítis seríuna haha þannig að mín bíður skemmtun endalaus skemmtun framundan, enda eins gott þar sem ég er meira og minna ein heima öll kvöld þar sem Brynja fer mikið í félagsmiðstöðina og svo á ég mann sem er vinnufíkill..svoleiðis er það. En hann er heima í kvöld já Sæll segi nú ekki annað. Verð líklega að fara að finna mér meira að læra svo mér leiðist ekki svona...haha NEI TAKK

Snjóar hér og er í kringum 8°C fallegt veður bara, væri til í að fara í göngutúr núna en skankarnir á mér bjóða ekki upp á það, mikill kuldi í fótunum og verkir bara, hélt þetta væri ekkert mál en þetta er mun meira mál en ég hélt en kannski spilar inn í að ég var með töluvert af hnútum:)

Ætla að fara að knúsa litla krílið mitt á meðan stóra krílið mitt liggur hérna á gólfinu og lærir þessi elska

O-sjúlli kveður hugsandi um McDreamy::) 

Tíminn kom.....

Loksins er komið almennilegt fólk í ríkisstjórn. Lýst ljómandi vel á hana Katrínu og svo ég tali nú ekki um Jóhönnu Sig bara með eindæmum sátt í dag. Vona að þeir nái að framkvæma það sem þeim hugnast á þessum 80 dögum sem þeir hafa, verður erfitt en vá ég styð þau. Nóg um það...

Ég er öll að koma til, enn töluverðir verkir í öðrum fætinum en ekkert sem verkjalyf ráða ekki við. Fór til Péturs í morgun vegna eyrans og það er orðið gott, á að nota eyrnadropana í 3 daga enn og þá er ég læknuð eins og dr Pétur sagði.

Fór með Kötlu til pabba í morgunkaffi í gærmorgun og síðan beint í sunnudagaskólann með sólarsystrum. Katla var nokkuð hress þar þó svo að hún hefði ekki mikla eirð í sér til að sitja kjurr, hefur það nú sjaldnast. Brynja kom kl 13 í gær eftir æfingar sunnan heiða, gekk ágætlega sagði hún, ekkert alltof ánægð samt en svona er lífið verður gaman að heyra hvað landsliðsþjálfarinn segir....

Feðgin eru úti að versla grænmeti, Katla voða spennt og þurfi að knúsa okkur Brynju x 3 áður en hún fór, agalega spennandi að fara í búðina, held reyndar að hún hafi haldið að þau væru að fara út að leika en ekki á allt kosið. Frekar kalt hér á Eyrinni núna þannig að það er gott að vera bara heima:)

Alveg orðin húkkt á Grey´s og lá fram til að verða tvö í nótt að glápa, náttlega ekki í lagi með mann en þetta eru bara bestu þættirnir, ætla að fara á morgun og kaupa mér séríu 3. Ekkert að gerast enn í tölvunni minni, búðin hætt sem seldi mér hana, en ég bjallaði í neytendasamtökin sem bentu mér á að tala við apple í Rvík og athuga hvað þeir gætu gert. Trúlega hef ég tapað ársábyrgðinni sem ég átti inni og verð því að borga þetta sjálf fokk

Ætla að maila á þá á eftir og athuga hvað skjákort kostar og skjár í þessa tölvu.

Best að fara að slaka aðeins á á meðan feðgin chilla úti..

O-sjúlli kveður pínu leiður 

Múmía

Já það er ég:) Vafin upp að nára og líður hreinlega bærilega bara takk fyrir. Fór í æðahnútaaðgerðina í gærmorgun og svaf eins og engill eftir hana til 10.30 þá fannst mér kominn tími til að vakna en ekki liðinu sem sinnti mér því ég fékk viðbót af svæfingu og svaf til kl 11.30 en þá fór ég og klæddi mig og fékk ristað brauð og hrikalega gott kaffi. Spjallaði svo aðeins við Harald og Hildur kom svo og sótti mig rétt fyrir kl 14. Litlir verkir þannig séð í gær enda á verkjalyfjum en verri í dag, tekur kannski meira í en samt ótrúlega litlir verkir, ánægð með það. Starfsfólkið þarna er svo frábært allt saman, bara hver manneskjan yndislegri, persónulegt svolítið:)

Ligg núna og góni á Grey´s með tærnar upp í loft og bara tek því rólega. Sé að það hefur blætt töluvert í umbúðirnar og mikið mar að myndast en allt fyrir fegurðina:) Hildur sys ætlar svo að taka sauma og plástra eftir rúma viku þannig að eins gott að maður hefur heilbrigðismenntað fólk í ættinni tja hvað getur maður sagt, sparar manni pening:)

Sá að ég hef fengið inn hækkunina mína fyrir námið og líka fyrir kjarasamningana þannig að ég hækkaði allt í allt um 47 þúsund krónur og það munar um minna í svona árferði eins og er þessar vikurnar.

Nenni ekki að blaðra neitt núna ætla að halda áfram að horfa á Grey´s vantar samt seríu 3 og 4 ef einhver er lánsfær með þær eru þær vel þegnar

O-sjúlli kveður tindilfættur fljótlega 

Hver er með vúdúdýrið

Fór upp á slysó í morgun kl 05.30 þá hafði ég ekkert sofið síðan hálftvö vegna brjálaðs kláða. Hitti þar skapvonda hjúkku en ljúfan lækni, sem sagði mér að ég væri líklega með mjög slæmt lyfjaofnæmi eða annað ofnæmi sem kemur stundum vegna síendurtekinna sýkinga. Kíkti svo í eyrað og sagði mér að það væri töluverður vökvi á bakvið hljóðhimnuna og trúlega þyrfi að skera í hana lovely. Lét mig hafa stera við eyranu og kláðanum og svo ofnæmistölfur sem ég tók í kvöld þar sem hann sagði að ég yrði ofsalega sljó og þreytt af þeim en það eina sem gerðist var að tungan í mér er eins og í nauti get ekki talað þvi munnurinn á mér er fullur af tungu. Fer svo til Péturs í fyrramálið og síðan líklega til háls- nef og eyrna einhverntímann í framhaldi af því. Læknar elska mig er alltaf með eitthvað svona skrýtið fæ aldrei venjulegar pestar:) Ætla ekki að reyna að lýsa kláðanum my gad

En fór nú í vinnuna mína kl 8 og stóð mína plikt. Ætlaði svo að sýna íbúðina í dag þar sem einhver stelpa var búin að melda sér mót en hún mætti aldrei, slökkt á símanum og allt í volli þannig að ég fór heim i fílu. Strákurinn sem ætlaði að leigja missti nefnilega vinnuna og bakkaði út,eðlilega...greyið.  Báðir bílarnir fullir af drasli, ætla að reyna að fara á haugana á morgun ef ég hef tíma frá kláðastundinni minni:)

Brynjan mín var valin á landsliðsæfingar með U-17 í Reykjavík um helgina, bara gaman að þvi, ásamt tveimur öðrum úr Þór. Ætla að hringja í Ása frænda og væla nema hún fái að gista hjá annarri vinkonu sinni sjáum til með það......

Ætla að fara að sofa hef frekar lítið sofið sl sólarhring og ekkert víst að ég sofni þar sem sterar valda oft svefnleysi, vííííí´

O-sjúlli kveður óvenjulegur 

Lífið er kláði

Hver er með vúdú dúkku þarna úti til að klekkja á mér, ég meina það, eitthvað er það. Vaknaði í nótt með þennan líka ofsakláða og er komin með eitthvað fjandans lyfjaofnæmi, spurning hvort það er fyrir þessum verkjapillum, bólgueyðandi pillum eða sýklalyfjum (engin smá dobía sem ég hef verið að taka) hef samt trú á að þetta sé af verkjalyfjunum eða bólgueyðandi þannig að núna ætla ég að stræka á allt í bili, hef bara mina eyrnabólguverki og hananú.....nú er nóg komið, átti sem betur fer ofnæmislyf sem Rakel hefur þurft að taka og gleypti í mig eina í morgun og það svínvirkaði en svo tók ég aðra áðan og hún virkaði ekki, verð líklega að fara til doktors eina ferðina enn á morgun, HJÁLP

Fór í sunnudagaskólann með Kötlu, Sólarsystrum og Hillu í morgun verulega gaman, og fílaði Katla sig fljótlega eftir að feimnin fór af henni. Hilla bauð okkur svo í pylsu m/öllu á eftir og fórum svo heim. Ég dreif mig svo á tónleikana hans Eyþórs með synfóníunni og það  var magnað, strákurinn uppskar mikið lófaklapp og var þetta ofsalega flott hjá þeim öllum.

Núna er ég að horfa á mynd sem heitir Aðskilnaður og fjallar um Alzheimer sjúkdóminn, fannst hún mjög heillandi fyrstu 15 mín en síðan fór hún að dala, búin að sjá margar bíómyndir sem fjalla um Alzheimer en þessi er sú lélegasta. En margt i henni samt.....

Eyþór er á djamminu með einhverjum úr hljómsveitinni jájá en færði mér samt blómin sem hann fékk fyrir tónleikana áður en hann fór:)  

Æi hef ekkert meira að segja ætla að fara að klóra mér eins og vitfyrringur og klára að horfa á myndina og fara svo að sofa...

O-sjúlli kveður klórandi 

Hvað er að í heimi hér....

Karlanginn hann Geir harði, ofaná allt annað að veikjast af svona illkynja sjúkdómi...en svona er lífið stjórnmálamenn geta líka veikst ótrúlegt en satt. Varð glöð að heyra að kosningar verði núna fljótlega en vil nú samt sem áður að stjórnin segi af sér takk fyrir og gúddmoren.

Föstudagskvöld og hvað er í sjónvarpinu, tóm hörmung bæði á Rúv og Stöð2 hvað er málið. Ekki fyrsta föstudagskvöldið sem vonlaust sjónvarp er, en þá er eins gott að ég hef tölvu til að nördast í og góða bók að lesa.

Brynja fór á Hvammstanga á litla Samfés og kemur á bilinu 2-3 í nótt, vona að ég þurfi ekki að sækja hana, getur kannski sníkt sér far frá Glerárskóla. Eyþór kom heim um kl 17 og fór aftur um kl 20 en ég í millitíðinni ákvað að gefa kallinum bóndadagsmat og fór og keypti rándýran þorramat, hefði getað boðið kallinum út að borða fyrir þann pening, (vonandi les hann þetta og sér hvað ég eyddi miklu í hann) og það engan skitinn borgara takk fyrir múhaha en hann fékk engin blóm og enga gjöf, fær hana bara seinna þegar ég sé hann meira en klst á dag að meðaltali yfir vikuna. Annars eru tónleikarnir á sunnudaginn þannig að þá fer ögn að róast hjá honum vona ég, nema hann sé með eitthvað annað svona stórt á prjónunum hvað veit ég.

Fórum við systur til pabba í hádeginu með mat úr Hrísalundi, var karl þá reyndar nýbúinn að borða þannig að hann borðar hann bara seinna en ég úðaði mínum í mig á korteri því ég þurfti að sækja Kötlu. Ætlum svo að fara á sunnudaginn líklega og klára að græja Smárahlíðina fyrir leigjandann og ætlar pabbi að koma með og hjálpa okkur, hefur gaman af því að brasast aðeins. 

Fer í aðgerðina á fimmtudagsmorgun og kvíði fyrir, en verður geggjað þegar þetta er búið og verð þá með fallegustu fæturnar í fjölskyldunni, erfði nú líklega það frá henni móður minni sem hélt því alltaf fram að hún væri með fallegustu tærnar í okkar fjölskyldu, fengum við systkinin yfirleitt hláturskast yfir því, ekki að hún hefði ljótar tær, maður bara státar sig ekki af tánum af sér..bara snillingur. Þannig er það nú, þarf einhvern til að sækja mig kl 14 eftir aðgerðina og keyra mig heim, akkúrat tíminn sem Katla sefur þannig að ekki gerir kallinn það, Hildur ætlaðir þú ekki að bjóða þig fram......hélt það...

Blygðunarbarmar, hefur einhver heyrt þetta áður, ég fékk nett kast þegar mér var sagt þetta í dag og hafði aldrei heyrt þetta notað um þennan líkamshluta en svona er að vera úr sveitinni hét allt öðru nafni þar...fæ enn nett kast þegar ég hugsa um þetta orð dúddamía. Svava heldurðu að þetta sé nýyrði???

Veit ekki hvað skal röfla meira, hef lítið um að röfla en alltaf gubbast eitthvað upp úr mér merkilegt, greining munnræpa á háu stigi takk kærlega. Kettirnir mínir eru geðklofa held ég án þess að ég sé eitthvað að gera grín að þeim sjúkdómi eða lítið úr honum, þá bara er þetta staðreynd held ég, ef ég byggi í Hollywood myndi ég líklega fara með þá tiil sálfræðings en hér í landi þar sem allt er á hausnum gerir maður ekki svoleiðis....

Sjúlli kveður kannski geðklofi sjálfur