Útrás

Fyrir blaðrið í mér. Eins gott að það er eitthvað til sem heitir blogg, veit ekki hvernig þetta yrði annars. Ekki að það sé neitt mikið að frétta alls ekki en samt einhver þörf til að blaðra, nenni nefnilega ekki að læra en það er nú gamalt vandamál.

Alltaf jafn gaman í vinnunni minni, alltaf að kynnast nýju fólki, og eins og þær í vinnunni segja þá eru sumir sem maður fer til þannig að það er mannbætandi að fara þangað. Fór til einnar svo yndislegrar í gær að ég er enn mjög svo jákvæð eftir að hafa verið hjá henni. Hún er blind en samt svo jákvæð og klár og skemmtileg.  Svona er þetta nú

Styttist í að maður fari suður, spennandi en samt kvíðir mig svolítið fyrir því. Ekki beint því að fara í skólann heldur meira því að keyra með litla orminn suður því henni finnst ekkert æðislegt í bíl en maður lætur sig hafa það.

Brynja mín er að fara suður  á föstudaginn að spila úrtakslandsliðsleik með U-16 við einhverja Norsara, vonandi að þær snýti þeim bara. Þórsara þjálfarinn hennar fer með þeim og ætlar að sjá um þær, en svo er leikur í innanhúsmóti á laugardag og svo æfingarleikur á sunnudag. 

Best að fara að hætta þessu hangsi og fara að gera eitthvað eins og t.d. að skoða blöðin mjög efnilegt

Sjúlli kveður bless 

Auglýsingar-hvergi friður

Nú hafa moggabloggstjórar gert eins og allir aðrir, sett auglýsingar inn á ´blog.is.  Óþolandi helvíti!

Ég þoli ekki auglýsingar sem eru neyddar inn á mig, ég get valið um að slökkva í sjónvarpi þegar auglýsingar byrja, en ef ég ætla að blogga eða lesa blogg þá verð ég greinilega framvegis að sjá blikkandi auglýsingu frá símafyrirtæki.

Það er þó eitt fyndið við þetta allt: http://vodafone.blog.is/blog/vodafone/

Eyþór

Miklar hetjur þessir feðgar

Sýnir manni hvað er nauðsynlegt að kunna þetta:)

Húrra fyrir Bjössa og Tomma :) Magnaðir enda eiga þeir ættir að rekja í Norður Þingeyjarsýslu, hefði nú haldið það og reyndar þau öll:)

Sjúlli kveður ánægður með sveitunga sína:)

Bjargaði eiginkonu í hjartastoppi

Tíu dagar hvað er málið

Já ekkert bloggað í heila 10 daga, og ég sem er þekkt fyrir munnræpu, greinilegt að maður er byrjaður að vinna Búin að vera að vinna í heimahjúkrun í heila viku og ég elska það hreinlega. Mikið er gott að vera þar og ég er búin að fá fastráðningu upp á 60% og fæ að bæta við mig ef ég vill kvöldvöktum sé til með það, sýnist þetta vera nóg með skólanum og öllu hinu. Búið að vera heilmikið í skólanum, dálítið af verkefnum og mikið lesefni þrátt fyrir að þetta séu bara 2 fög. Er svo að fara suður á miðvikudaginn í næstu viku og kem aftur heim á sunnudag jibbí skibbí. Hélt þetta yrði ferlega næs nei takk bara 8-17 skóli takk fyrir

Búin að vera veikindasería hérna á þessu heimili s.l. barasta held ég 2 vikur, Katla byrjaði á mislingabróðir og ég með kvef, hita og hálsbólgu, svo þegar Katla var búin að ljúka mislingadæminu þá fékk hún þetta ferlega kvef og fékk líka 1 tönn og önnur á leiðinni Brynja fékk líka þetta yndislega kvef en þær eru á seinni sprettinum í því sem betur fer.

Fengum fullt af heimsóknum um helgina, Ágúst kom að sunnan og var um helgina, svo komu Lilja, Kiddi og Þóra og jú Fannar datt aðeins inn líka, svo gaman að sjá allt þetta gengi, Liljan mín komin með litla og fallega kúlu og lítur svo vel út eins og við gerum jú alltaf við frænkur ekki sattÉg er nefnilega svo sæt (handarhreyfing yfir andlit) jájá maður getur verið ruglaður endalaust. Þóra og Kiddi eru að flytja hingað á Eyrina næsta sumar og verða í skóla hérna skemmtilegt, sér kannski liðið eitthvað oftar, ekki nenni ég austur hahaha.

Sá í dag að það er verið að fara að bjóða upp á enn meira framhaldsnám sjúkraliða á háskólastigi og verður það geðhjúkrun mjög spennandi diplóma nám sem á að vera held ég 2 ára nám. Verð ég í skóla þangað til ég dey, tja svei mér þetta er svo gaman en samt tekur þetta á:)

Best að fara að gera eitthvað af viti, var að klára 25 spurningaverkefni um sykursýki, haha kallinn með sykursýki þannig að ég snýtti þessu á augabragði tja svona næstum og lét hann fræða mig um það sem ég var ekki alveg klár á. Húrra fyrir mér.

Sjúlli kveður sykursætur

Snilldar snyrtistofa

Fór í litun og plokkun í dag sem er svo sem ekki í frásögu færandi, nema ég ákvað að prófa nýju snyrtistofuna Lind í Hafnarstræti. Mér hefur nú alltaf fundist frekar vont að fara í þetta en jú allt fyrir fegurðina, sem reyndar er næg fyrir en alltaf getur maður nú á sig blómum bætt. HAHA

Jæja s.s. ég lagðist í stólinn eins og maður gerir, en hún byrjaði á að breiða yfir mig teppi, lét svo heita steina í sitthvora hendina og einn heitan stein undir hvora öxl. Síðan bara skellti hún á mig lit og þegar það var komið slökkti hún öll ljós og nuddaði á mér hálsinn og axlir með heitum steinum YNDISLEGT. Svo þegar liturinn var búinn að vera nógu lengi þreif hún og vaxaði og nuddaði svo augabrúnir og andlit með köldum steinum. Kom endurnærð út í snjókomuna aftur. Mæli 100% með þessu og þetta tók 20 mín. TÆR SNILLD allir á snyrtistofuna Lind og nei ég fæ engar prósentur er bara gríðarlega ánægður kúnni

Að öðru, Eyþór spurði mig fyrir svona 5 mínútum hvort ég vildi frekar horfa á Borat eða Mr and Mrs SMith og ég sagði mér væri alveg sama en heyrðist Borat eiga að verða fyrir valinu, núna sit ég í tölvunni og hlusta á hann hrjóta alveg ofsa hátt, já svona eiga kvöldin að vera

Annars er Brynja stödd á Húsavík á Samfés söngvakeppni og kemur um kl 1 í nótt. Var voða spennt í dag að fara skiljanlega, ábyggilega mikil stemning í gangi.

Ég aftur á móti á að vera að læra, náði nú að fjárfesta í tveimur bókum í dag, ein á ensku og efast ekki um að ég brilleri í því. Svo á ég eftir að kaupa eina danska og brillera ábyggilega enn meira í því. En bara gaman. Byrja að vinna á mánudag og hlakka til að fara að vinna á mínum uppáhaldsstað heimahjúkrun jibbí skippí.

Erla mágkona mín kom í morgun og var hér framundir hádegi en hún var að bregða sér í borgina, skutluðum henni út á völl um 11.30, öfundaði hana nú ekki af því að fara í flug en maður lætur sig nú svo sem hafa ýmislegt til að komast í borg Villa, nei Dags, nei Ólafs eða var það Villi. Mér fannst spaugstofan fyndin og fáránlegt ef maðurinn heldur að þetta hafi beinlínis verið persónuleg árás á sig. Hann verður að geta tekið gríni eins og aðrir. Allavega fannst mér þeir alls ekki fara yfir strikið bara fyndnir:) Hlakka til að sjá þáttinn þeirra á morgun og er viss um að hann slær áhorfsmet.

Var líka að horfa á þáttinn hans Bubba áðan og ef Bubbi er ekki flottastur veit ég ekki hver gæti hugsanlega verið það. Bara er aðdáandi nr 1 finnst þetta svo magnaður tónlistarmaður, flottur karakter og ég hreinlega bara dýrka manninn og dái. Nóg um það.

Sjúlli kveður geðveikislega sjúk í að verða borgarstjóri

Stundum skildi maður þegja

Úldnar ekki aldeilis

Ekki margir dagar síðan ég gaf þá yfirlýsingu að ég yrði eiginlega ALDREI veik, mér hefndist fyrir montið því núna er ég stútfull af hor, andlitið stíflað og svo mikið ofaní mér að ég kúgast í hvert skipti sem ég hósta. DAMN en sem betur fer gengur þetta fljótt yfir er nefnilega svo hraust svo ég haldi áfram að montast.

Hefði samt ekki getað komið á verri tíma þar sem Eyþór er úti og Katla búin að vera þvílíkt lasin og frekar en ekki þá steyptist hún út í útbrotum í gær sem á að líta á í dag, líklega eitthvað sem er kallað mislingabróðir og er líklega ástæðan fyrir þessum veikindum hennar síðustu daga. En hún er nokkuð hress samt en svona ýlin inn á milli þannig að mamman er með snýtubréfakassann og skríður hér um gólfið til að reyna að halda uppi stuði agalegt. En sem betur fer þá bjargar Brynja mín ýmsu þegar hún er heima, dugleg að leika við systur sína í gær enda held ég að hún hafi séð það á mömmunni að hún var að bugast.

Ekki svo nóg með það heldur stóð svona í henni áðan að hún blánaði upp og mamman snögg smellti henni yfir hnéð og sló í bakið og þá stökk hálf kleina upp úr henni sem hún hafði rænt af mér, mamman ekki með öll skilningarvitin á hreinu. En ég veit ekki hvor varð hræddari ég eða hún almáttugur 

Allt að lagast bara vonandi. Skólinn byrjaður og ég á að skila verkefni þann 2 feb eins gott að Eyþór kemur heim á fimmtudag, þar sem ég hef ekkert getað lært og á enn eftir að finna allar bækurnar sem ég þarf að nota. Ætlaði að vera svo dugleg þessa fríviku mína áður en ég færi að vinna en það fór eitthvað öðruvísi

Best að fara að sinna litla ýludýrinu mínu og fá mér eins og eina flösku af lýsi í hádegismat

Sjúlli kveður  skál "hikk"

Sofnuð

Búin að hanga á netinu núna standandi hérna við píanóið, ætlaði bara aðeins að kíkja í tölvuna en án gríns þá er ég búin að standa hérna í u.þ.b klukkustund. Svona getur netið tekið tímann frá manni. Ákvað að blogga þar sem ég nenni ekki alveg strax inn í rúm.

Eyþór kallinn er kominn til Frankfurt og búinn að skoða eitt orgel með Pétri H og Lars. Ætla svo að skoða held ég ein 2-3 orgel á morgun og keyra um 500 km bara brjálað að gera hjá þeim. Hann var himinlifandi með það sem hann var búinn að skoða og virðist þetta ætla að lofa góðu.

Brynja er veðurteppt í borginni en var í Smáralindinni og búin að fjárfesta aðeins þar þannig að henni leið ögn betur með það;) Var svo komin heim til vinkonu sinnar þar sem þær gista og voru að horfa á videó. Var ekki sátt með fyrri æfinguna fannst sér ganga illa en betur í dag allavega. Þetta eru 30 stelpur sem allar eru að keppa að því sama komast í landsliðið þannig að það er við marga að keppa. Flestar stelpurnar voru auðvitað frá stóru liðunum að sunnan ekki svo sem við öðru að búast þannig er það oftast.

Við Katla höfum lufsast hér í dag, hún með háan hita en snarlækkaði núna undir kvöld og borðaði meira að segja þannig að hún er held ég öll að hressast sefur núna og búin að sofa sæmilega frá því um 20.30. 

Ég er byrjuð í skólanum og líst vel á en hugsa að þó svo að ég sé bara í tveimur fögum þá verði alveg nóg að gera. Var að byrja á fyrsta verkefninu sem á að vera 2 bls A-4 og svo eru komin nokkur svona upprifjunarverkefni. Finn bara hvergi allar þessar bækur sem ég á að læra úr. DAMN

Svo auðvitað fer ég í eitt fag í sumar en það er verklegt í 8 vikur, var búin að sækja um að vinna í heimahjúkrun eða Hlíð en svo fattaði ég að heimahjúkrun kemur ekki til greina þar sem við megum ekki taka þetta verklega á okkar vinnustað, Magga Pé kom svo aðeins í gær og benti mér á Kristnes sem mér hafði nú barasta ekki dottið í hug en þar er auðvitað svo gríðarlega mikið og fjölbreytt starf. Þannig að ég sendi strax mail í FÁ og bað um Kristnes svo kemur í ljos hvað verður.

MArgt að byltast um í mér þessa dagana veit stundum ekki hvort ég sný á haus eða eitthvað annað. Best að fara að leggjast bara flöt og reyna að sofa á þessu öllu saman

Sjúlli kveður veit ekki hvernig hann á að snúa sér í þessu öllu saman HJÁLP 

Vakna svo...

Ótrúlegt hvað maður getur orðið orðlaus í langan tíma. Kemur nú sjaldan fyrir mig en hef átt við ritstíflu að stríða í töluverðan tíma núna.

Fórum til Búðardals á mánudagskvöldið þar sem við hröktum tengdó úr rúmi, fallega gert af okkur:) Alltaf gott að koma þangað, Kötlu fannst Homer afskaplega óskemmtilegur fyrst, en þau voru orðin miklir vinir í lokin, þegar hann veifaði skotti, veifaði hún fótum í takt jája. Fórum svo suður á þriðjudagsmorgun þar sem ég átti að hitta 2 skrýtna lækna og Eyþór hitti sykursýkislækninn sinn í gær og var hann mjög sáttur eftir þann hitting. Er settur í forgang með dælu og var líka settur á nýtt insúlín en ef það virkar vel sleppur hann kannski við að fá dæluna allavega í bili.

Fórum ekki í neina búð, held það hafi aldrei komið fyrir áður að maður fari suður og fari ekki í búðir tja það var fínt.  Þurftum á þrjá staði en fundum ekki stæði á þeim stöðum fyrr en eftir langan tíma. Voðalega er mikið af bílum í Reykjavík. Fólk ætti nú kannski að labba og nota strætó meira en það gerir, nei segi svona. Mengunarský sveif yfir borginni og var ég voðalega fegin að bruna út úr bænum, en kem aftur í febrúar.

Brynja ákvað að vera hjá Lilju ömmu á meðan við færum þessa ferð, vildi ekki fórna fótboltaæfingu fyrir það (skil hana mjög vel). Enda eins gott því hún var valin í úrtak fyrir U-16 landsliðið og er að fara suður á landsliðsæfingar um helgina. Dugleg stelpa enda þetta sem er draumurinn.  Svo bara að sjá hvernig það gengur. Voru þrjár úr Þór sem voru valdar og það allt vinkonur:) Gaman að þessu enda ánægð stelpa sem hringdi í mig suður  Eini gallinn finnst mér er sá að KSÍ reddar þeim ekki húsnæði eða sér neitt um þær, borga bara flugið og búið, þær þurfa að redda sér gistingi og einhverjum í að skutla sér, og ekki allar sem þekkja einhvern í Reykjavík. Þær eru nú bara 14 ára á 15 ári reyndar en sama. Skilst að KSÍ reki eitthvað gistiheimili hefði nú fundist að þær gætu fengið að vera þar. En Eyþór ætlar kannski að redda þessu og fara bara fyrr en hann ætlaði á laugardaginn, þá getur hann verið einkadriver fyrir þær:)

Erum að fara með Kötlu í skoðun á eftir og verður gaman að sjá hvað hún er orðin löng og þung. Hendist um allt og er langt yfir leyfilegum hraðamörkum á köflum. haha mokar sér áfram á rassinum með annan fótinn framfyrir hinn þetta er bara fyndið. Er dálítið hornótt eftir gærdaginn en hún fékk þrjá góða marbletti þá, svolítið djörf sú stutta. En það lagast VONANDI.

Jæja ætla að fara að fá mér smá hitapoka, svolítið stirð eftir bílsetuna í gær.

Sjúlli kveður ...... 

 

Heilræði

Ef fyrirhugað er éta yfir sig af Chili con carne með extra miklum af baunum og grænmeti er gott að hafa tvennt í huga:

1.  Ekki belgja þig út af nýbökuðu heimatilbúnu rúgbrauði fyrr um daginn.

2.  Ekki skipuleggja neitt næsta dag sem ekki leyfir að þú látir þig hverfa skyndilega í góða stund

Heilræði dagsins er í boði Papco

Eyþór 

Jävla svenskar!