FREUD fretur

Pirruð, pirruð og endalaust pirruð. Er bara ekki að höndla sálfræðiverkefnið núna bara engan veginn þetta snýst allt í hausnumá mér og ég skil ekki neitt, einn af þessum dögum. Brynja kom með sleikipinna handa mömmunni til að reyna að mýkja hana í skapvonskunni þannig að núna er ég skapvond og kinnfiskasogin eftir að sjúga sleikjóinn. 

Verð mjög ill þegar illa gengur en það gengur yfir, er líka svo hrikalega þreytt eitthvað og þá næ ég enn síður einhverju samhengi. Gæti leitað á náðir Pétur sálfræðings sem býr hér fyrir ofan mig tja það væri það:)

Eyþór skrapp á örstuttan fund upp í Glerárkirkju sem reyndar er núna orðinn að 2 tíma fundi skal segja ykkur það en svona vill þetta nú oft verða. Ekkert að kvarta undan þér kallinn minn bara smá að PIRRAST haha

6 október er dagurinn okkar Brynju en þá ætlar Eyþór að vera alveg í fríi og við að fara í ljós og á kaffihús og í bíó og eitthvað svona mæðgnastúss höfum ekki getað það síðan Katla fæddist en nú eigum við það skilið kjellurnar. Lit og plokk og eitthvað svona skemmtilegt.

Sláturgerð á morgun ja er komin með nettan hnút í magann en Una er líklega í þessum skrifuðu orðum að rogast með 10 slátur heim til sín, ætlum samt að mauka þetta hér þar sem okkar eldhús er ögn stærra en þeirra, verður byrjað kl 10 í fyrramálið stundvíslega takk fyrir og góðan dag, maður er nú ekki alinn upp í sveit fyrir ekki neitt. Get æft mig í LOL á meðan á sláturgerð stendur rifjað upp eitthvað um blóðið og svona múhahhaaha

Katla sefur úti núna eitthvað ergelsi í henni búið að vera og svaf frekar lítið í morgun en mamman náði nú að treina það töluvert og las sálfræði af miklum móð á meðan.

Ofsalega fallegt veður og 14 stiga hiti. Langar nú smá út en ég ætla ekki að láta það eftir mér onei skal draugast til að læra. Get reyndar lært mikið í næstu viku þar sem Eyþór verður meira og minna í fríi þar sem aðstoðarorganistinn er að koma beina leið frá Köben þannig að hann þarf bara að vera með stúlknakórsæfingar sem eru 2 þá vikuna, en líklega verður Óskar Pé hér meira og minna að æfa þar sem fer að styttast í tónleikana þeirra.

Hef ekkert að segja varð bara aðeins að leiða hugann frá sálinni og hvar er betra að detta niður en í bloggheimum þar sem maður getur röflað eins og mann lystir og eins mikið og mann lystir. Já lífið er ljúft.  

Sjúlli kveður dauðleiður á Freud......og öllu sem endar á fræði

Ég er svo illa upp alin en þessi er góður

Ég held að þú hafir snúið sundbolnum öfugt.......hahahahha nei heldurðu það félagi....eins og í næturvaktinni Sæll félagi.

 

Sjúlli kveður eigum við eitthvað að ræða það meir 

Dagurinn í dag

Ef ég væri ekki með litað hár sæist allt það gráa núna því það er pottþétt orðið grátt þarna undir eftir tölvuhöfuðleggíbleyti í dag. Þar sem ég er með makka þá heitir forritið sem ég er með Iwork og er eins og office pakkinn í PC. En forritin eru auðvitað ekki eins í raun miklu skemmtilegri en office en þegar maður er ekki búinn að læra alveg á þau áður en maður fer í skólann lendir maður í þvílíku brasi. En ég s.s. er búin samt að senda PPT verkefnin mín en þau virkuðu ekki alveg eins og þau áttu að gera en svona er þetta bara Svo þar fyrir utan var WebCt bara alls ekki að virka í makkanum mínum fyrr en ég hrærði í einhverju ekki alveg klár hverju og allt í einu fór þetta í fína virkni eða svona næstum því. Gaman að þessu og maður verður bara að redda sér.

Tók mér smá pásu núna ætla svo að henda mér í sálfræðina eða Lol á eftir. Gaman að því

Annars hefur dagurinn í dag bara verið spakur, vaknaði í morgun og var sko alveg viss um að ég væri komin með botnlangakast og fór því í bað til að vera klár í að leggjast inn og undir hnífinn, var án gríns alveg að drepast og það aðallega hægra megin. Sendi Svövu minni sms þar sem ég vissi að hún fór undir hnífinn ekki alls fyrir löngu í botnlangatöku  og lýsti hún einkennum fyrir mér og sá ég þá að líklega væri ég ekkert á leið undir hnífinn. Lagði svo hausinn í bleyti og mundi þá eftir því að hafa fengið svona áður, laumaði mér í ísskápinn þar sem Eyþór á Aloe vera safa og fékk mér röskan slurk (þvílíkur viðbjóður) en viti menn stuttu seinna var ég fín. Ég er með magabólgur og ekki í fyrsta skipti námið alveg að fara með mann haha nei segi nú svona á þetta til að fá þennan fjanda....

Ætlum að henda okkur í sláturgerð kl 10 á laugardagsmorgun og verðum hér. Verður endalaust stuð bara tókum 10 slátur eftir að Una hafði skeggrætt við konuna í Hrísalundi dágóða stund um hvað við þyrfum mikið, konan var hin almennilegast og fengum við fína þjónustu. Verður gaman höfum aldrei gert slátur sjálfar. Óskar Hafsteinn þarf að vísu að brenna og henda nafni á eitt krakkakríli en við tökum bara pásu á meðan hahahaha nei segi svona.

Brynja verður í fjáröflun fyrir Þór er að fara í vörutalningu í Byko óheppin missir af sláturgerðinni tja eins og henni sé ekki sama ábyggilega guðs lifandi fegin. 

Er að fara til Halla kuta Haukssonar á morgun til að láta hann meta hvort við ættum ekki að skera á eins og nokkrar æðar, fékk nokkra sæta hnúta meðan ég gekk með Kötlu og langar óskaplega til að láta laga þá og eins sprauta í smá slit. Hef látið gera það áður og það virkar enn þann dag í dag einhver ár síðan.

Hef ósköp lítið að segja núna reyni að tuða eitthvað bara til að þurfa ekki að fara að læra, eins og það bitni á einhverjum öðrum en mér jahérna.

Sjúlli kveður bólginn að innan

Yfirvigt

Það hlaut að koma að því að ég myndi nú sjá að mér og fara að hreyfa á mér rassgatið sem er löngu komið í yfirstærð. Kominn tími til að reyna að losa sig við kílóin sem ég jú át á mig með mikilli gleði á meðgöngunni og ætla mér að losna við líka með mikilli gleði haha most likely. Hef alltaf fundið eitthvað upp til að sleppa því að hreyfa mig en núna loksins er komið að því, finn að ég er tilbúin í þetta og bara verð skrokksins vegna. Bakið fer til fjandans aftur ef ég fer ekki að hreyfa mig reglubundið. Hvatningin hefur líklega aðallega komið frá videoinu í síðustu færslu haha. En ég s.s. dreif mig þegar Brynja kom úr skólanum og henti mér á hlaupabrettið mitt og hljóp rúma 2 km og svo drap ég boxpúðann í dálitla stund. Leið svona hrikalega vel á eftir og ætla til að byrja með að reyna að hreyfa mig 3-4 í viku og bæta svo matarræðinu inn í. 

Mér finnst mjög gaman að hreyfa mig og pældi alltaf mikið í því hvað ég borðaði datt inn í svona hollustudæmi alltaf annaðslagið en svo nottlega missti ég mig í gleðinni þegar ég var ólétt og ætla s.s. núna að missa 10 kg takk og góðan dag:)

Nóg um mig og minn mör

Í gær var lokahóf Þórsara kvennaflokka og kom Brynja Dögg heim með jákvæðniverðlaun yfir alla kvennaflokka og farandbikar. Já þessi elska svo jákvæð *hóst* hefur það frá mömmunni..haha Var sjálf voða ánægð með þetta sérstalega þegar hún gerði þá uppgötvun að allar sem höfðu áður fengið þessi verðlaun höfðu endað í meistaraflokki

Ligg hér eins og klessa upp í rúmi, Katla alltaf að vakna var í sprautu í morgun og hún er að ergja hana þannig að ég ákvað að fara að læra lagðist hér með tvær bækur en síðan er meira en klukkutími og ég hef ekkert lesið hvað er eiginlega að mér. Alger auli. Eyþór er að vinna og Brynja fór út í þorp til vinkonu sinnar. 

Helv....myndavélin okkar er ónýt eða allavega virkar hún ekki og ég nenni ekki að fara með hana í viðgerð til að borga jafn mikið fyrir það eins og að kaupa sér einhvern ræfil. Ætla að sjá til, Brynja á mjög góða vél sem hún fékk í fermingargjöf en ég kann ekki að minnka myndirnar úr henni þannig að það er alltaf tómt vesen. Ohh  ekki að þola þetta.

Elíns sys og Viðar komu aðeins við hér í dag, Elín var að vinna og Viðar s.s. kom inneftir að sækja hana þar sem bensinn þeirra var í einhverju skrolli. Svo kom Hildur sys og dætur líka jájá

Erum að fara í sláturgerð um helgina haldiði það verði gáfulegt haha Una ætlar að koma á morgun og við að spá í hvað þarf að kaupa. Hvað þýðir eitt slátur t.d. hvað er í því....já maður er nú alinn upp í sveit en samt veit maður ekki svona grundvallaratriði skamm.

Best að fara að lesa aðeins áður en ég sofna, besta leiðin fyrir mig til að sofna er að opna bók þannig að ég verð líklega sofnuð innan nokkurra mínútna.

Hafið það sem allra best í dag lömbin mín ja þau ykkar sem ekki verða í slátrínu mínu um helgina

Sjúlli kveður útvaxin á ýmsum stöðum

Þetta er hrikalega fyndið:::)

Ég bara varð að setja þetta hérna inn ég pissaði næstum í mig úr hlátri en hún Anna Ruth samnemandi sendi mér þetta.

Dóp og rugl

Vá hvað lögreglan á mikið hrós skilið fyrir aðgerðir gærdagsins. Ekkert smá magn sem þeir eru að uppræta og margir fíklar sem urðu af sínum skammti. En ætli sé ekki nóg dóp í umferð samt þó svo að þetta hafi náðst er nú heldur betur hrædd um það.

Er frekar ljót í dag, allavega ljótari en venjulega, svaf mjög lítið í nótt, dóttlan mín var ómögleg fram undir miðnætti og sofnaði þá og ég fór að þykjast læra. Stóra dóttlan mín var á svokölluðu Rósaballi í Glerárskóla og ég sótti hana um miðnætti akkúrat þegar ég var að þykjast vera að læra En já sofnaði ekki fyrr en að verða 2 og var mín rumskandi í alla nótt. Já svona er nú að vera mamma skal ég segja ykkur og ekkert að því nema þetta með ljótuna, langar svo að vera sæt

Ætla að henda inn einni mynd hérna sem ég fann á netinu og finnst smá sniðug en á henni sjá ungir krakkar 9 höfrunga ég hef ekki séð 9 enn en ég er enn að leita en er kannski orðin of gömul til að sjá

Þetta er s.s. myndin og skoðið nú ég er farin að læra haha

Sjúlli kveður langar að verða lögga

 

 

 

 

 

Lausn á jákvæðnifærslunni

Tja hvað getur maður sagt. Lausnir segið þið ja nú eiginlega bara er komið upp svona "klóra sér í hausnum" ástand. Hmmm...*hugs*

Nr 1 Sýna makkagreyinu þolinmæði get lítið annað gert jú og svo auðvitað farið og látið kíkja á greyið kannski eitthvað veikur.

Nr 2 Á nú eiginlega vð bara sama svar og í 1 held ég fer bara til eplakallanna í Haftækni og bið þá a kíkja á gripinn eins og ég segi eitthvað veikur greyið

Nr 3 Já væri ekki bagalegt að eiga eins og einn svona til að hjálpa sér og vera með aðstoð alltaf og núna og bara sí og æ já eða þennan  apa bara, manni yrði aldrei neitt úr verki með hinn gaurinn nálægt sér hahahha

 

 

 

 

Sjúlli kveður alveg snar

Jákvæðnin

Það sem pirrar mig mest er ............ hvíti flotti makkinn minn í augnablikinu

Það væri sniðugt ef til væri ............. hvítur flottur makki sem virkaði

Afhverju er ekki boðið upp á ............ aðstoð núna

 

Sjúlli kveður alveg búinn á taugum 

Skólafærsla en ekki hvað:)

Vorum á Húsavík í dag, fórum um hálfellefu í morgun og komum til baka um 5 leytið. Pabbi var bara sprækur og var búinn að sjóða hangikjet þegar við komum þannig að ég sletti mér í að búa til jafning og svo var snætt. Fórum svo í bíltúr upp á Húsavíkurfjall og út um allt í nágrenni Húsavíkur var virkilega flott veður og svona sól en kalt. Katla var í banastuði alveg hreint og mikið kát enda afi hennar alltaf að glenna sig eitthvað framan í hana. 

Pabbi fann gamlan olíulampa niður í geymslu sem amma Þuríður hafði átt og aldrei verið notaður og ég sem er svolítið hrifin af gömlum stíl svo ég tali nú ekki um ef ég veit að einhver amma mín eða afi hafi átt eitthvað. En s.s. hann gaf mér þennan fallega gamla lampa til að hengja á vegg og er ég núna að leita að stað til að setja hann upp.

Lærði s.s. ekkert í dag en hefði virkilega þurft að gera það en svo þegar ég ætlaði að fara að senda verkefni í gegnum WebCt þá auðvitað virkaði það ekki þannig að ég ætla nú að fara og hitta vini mína í Haftækni á morgun og biðja þá að setja inn þær stillingar sem eiga að vera í tölvunni er alltaf að lenda í brasi.

Jæja á að gera smá verkefni í UTN hér þannig að ég ætla að henda því inn í aðra bloggfærslu. 

Sjúlli kveður kátur að vanda 

Hún er komin

Já stóran mín er komin heim. Verð nú að segja að mér létti haha ótrúlegt en satt hugsa að ég sé háðari henni en hún mér En allavega komin heim sólbrún og sætari, fékk að vísu sólarofnæmi en það er á miklu undanhaldi, hendi henni bara út í rigninguna hér og athuga hvort þetta skolist ekki burt. Var svo fegin að koma heim en fannst alveg ofsalega gaman og skemmti sér mjög vel og er mjög kát. Keypti sér mikið, og auðvitað keypti hún bol handa systir sinni merktur katla 10 en uppáhaldsfótboltamaðurinn hennar er nr 10 þannig að auðvitað valdi hún það handa stubbu litlu:) Gaf okkur Eyþór ofsalega flottar myndir sem einhver maður málaði á meðan hún beið, tvær í fjólubláu og svörtu og mjög flottar þarf að finna ramma undir þær svo að sjálfsögðu keypti hún nammi handa nammigrísnum, nei ekki Eyþóri vissi að ykkur dytti hann fyrst í hug nei handa mér Svo tyggjó og meira tyggjó og ég veit ekki hvað og hvað.  En aðalmálið að það er gott að fá hana heim.

Er búin að vera að reyna að læra í dag gekk svona ágætlega þangað til að mér datt í hug að taka tölvuna inn í sama herbergi og ég var að læra í nema hvað ég datt á netið og gleymdi mér og heyri allt í einu að sú stutta er bara vöknuð og skildi hreinlega ekki hvert tíminn hafði farið já svona getur maður verið klikk.

Eyþór er að vinna og vinna og vinna og verður að vinna til allavega 10 í kvöld. Við ættum ekki að fá leið á hvort öðru eða hvað. Erum kannski að spá í að renna á Húsavík á morgun pabbi gamli átti afmæli í gær og ætluðum við að fara á sunnudag en það var svo fúlt veður þannig að við ætlum að skoða það á morgun. Annars bara fínt að frétta held ég. Svefn var í minni kantinum í nótt þar sem Katla heldur að á milli 3 og 5 eigi hún að vera með skemmtiatriði og spjalla og toga í mann og svona en er svo voðalega hissa þegar hún heyrir vekjaraklukkuna hringja kl 7 og vill sofa meira:) Tja svona er þetta.

Ætla að fara að spjalla við þessa brúnu stelpu hérna við hliðina á mér

Sjúlli kveður hvítur sem apaskítur