Hjólhýsi, tjaldvagnar, húsbílar hvað er málið

Vorum að koma úr ágætis ferð í Sauðhúsaskóg í Borgarfirði þar sem tengdó voru með bústað. Fallegur staður og mikið hægt að gera þarna, en bústaðurinn frekar lítill en eins og sagt er "þröngt mega sáttir sitja" og var það nú einmitt þannig. Fengum mikið og gott að borða og þetta var bara frábært í alla staði.

Þvílík umferð  bæði á suðurleið og norðurleið. Hef heldur sjaldan eða aldrei séð eins mikið af húsum á ferðinni hangandi aftan í bílum. Hvað er eiginlega málið. Hvað varð um gömlu góðu útileguna. Hvað varð um að lemja niður hæla og skríða algallaður niður í svefnpoka og vakna með smá hor í nebbanum og rauð eyru. Núna keyrir fólk á risajeppanum sínum með risahúsið aftan í, er þetta ekki að verða heldur ýkt dæmi, ég veit ekki ég hef aldrei verið í þessum pakka en einhvern veginn heillar þetta mig alls ekki. Það var svolítið um að það mynduðust bílaraðir og kannski 20 bílar í röð og pottþétt að af þeim voru 15 jeppar ef ekki meira og með svona lafandi í rassinum. Maður varla sá þetta fyrir 2 árum síðan. Svo komum við á Blönduós og fórum á Pottinn og Pönnuna og ætluðum aldrei að koma litla Passat með engu húsi fyrir á planinu því það var búið að setja svo mörg bílahús á planið að þar var eiginlega komið hálfgert bílaþorp.

Já svona er nú bara Ísland í dag en mér þykir þetta nú samt alveg ótrúlegt. Sök sér með tjaldvagna en hitt tvennt..jahérna og hér. En líklega er ég bara svona hrikalega gamaldags....ekki að ég er ekkert ofsalega mikið fyrir útilegur svona almennt:)

En nóg um þetta raus. Helgin var fín, mikið etið, skal reyndar viðurkenna að ég svaf lítið og var það ofsalega litlu rúmi að kenna með vondum dýnum en þegar maður á orðið hrikalega góðar dýnur og kodda og kaffivél þá eiginlega þyrfti maður að taka allt þetta með sér í ferðalagið. Maður er orðinn of góðu vanur og svo skammast maður út í þá sem eru góðu vanir í tjaldbúskapnum já maður er skrýtinn

Best að fara að sofa klukkan komin langt fram yfir minn normal háttatíma þannig að það er best að skammast í bælið

Sjúlli kveður tjaldlaus og allslaus 

Athugasemdir

[Sigurður Hreiðar, 13.8.2007 kl. 08:11]

Sæl Erna,

hér var ég búinn að skrifa heilmikla athugasemd þegar það rann upp fyrir mér að hún er bara blogg --

-- svo ég færði hana bara þangað!

Góð kveðja