Hann eldist eins og aðrir þessi elska

Já eiginmaðurinn er 35 ára í dag kallinn. Engin veisla eða neitt spurning að það verði haldið eitthvað upp á þetta seinna veit ekki aldrei að vita. Fórum snemma í morgun hele familien í frekar leiðinlegu veðri upp í Kjarna, ætlaði að finna mér köngla til að skreyta mér en minnsta meðlimnum var kalt og fannst ekki mikið gaman þannig að við fórum fljótlega heim bara.

Fórum svo mæðgur þrjár í að henda upp seríum í alla þá glugga sem ekki var komið í og eins fór ég aðeins í að þrífa í eldhúsinu og svona, annars bara rólegt þannig. Skutluðum okkur svo í ljós við Brynja og aðeins í húsasmiðjuna að kaupa smá efni í aðventukransinn sem er mjög einfaldur í ár en fallegur og stílhreinn hvítur og fjólublár.

Síðan brá Eyþór sér með myndavélina í Kjarna að mynda þennan mikla og fallega snjó og tók mikið af fallegum myndum. Fórum líka með Kötlu í kerrunni í bæinn að sjá jólasveinana og þegar kveikt var á jólatrénu, Kötlu fannst þetta allt mjög merkilegt. Síðan komu pabbi, Hildur, dætur, Elín og Viðar í smá franska súkkulaðitertu og kaffi. Nennti ekki einu sinni að elda handa kallinum en ætla að elda handa honum hangikjet á morgun taka smá forskot á sæluna, ef hann fer ekki á rjúpu það er að segja, ætlaði í dag en veðurspáin var bara alls ekki nógu góð en spurning um morgundaginn. 

Var búin að gefa Eyþóri snjóþrúgur í afmælisgjöf en þær brotnuðu við fyrstu ferð þannig að ég gat nú ekki annað en gefið honum smá pakka, keypti handa honum ilmvatn, andlitskrem og Mamamia sem við horfðum á í gærkvöldi og hún er æði. Fór aldrei að sjá hana í bíó þannig að þetta var bara snilld, sofnaði reyndar hjá Kötlu sem rumskaði þegar korter var eftir af henni og ég svaf með tyggjó í munninum og öllum fötunum í sömu stellingu og ég sofnaði í til kl 7 í morgun díses þokkalega þreyttur maður.

Hittumst á fimmtudaginn vinnan og það var virkilega gaman og mikið hlegið, bakaði eina kökutegund á staðnum til að fá ilminn og svo var konfekt, jólaöl og kaffi, lesnar vísur, prjónað, sagðir brandarar og bara hrikalega gaman, verkefnið ekki kynnt þar sem hinn hópurinn var ekki búinn en það á að gera það á deildarfundinum á fimmtudaginn er spennt, okkar er svo flott allavega finnst okkur það:)

Jæja ætla að fara að baða litla gorminn og góna aðeins á tv já eða taka einn skáp í gegn er sko í ham

Sjúlli kveður virkur

Frábær ræða Katrín

Má fólk ekki tjá sig hvað er málið. Fannst þetta frábær ræða hjá Katrínu og bara hipp hipp húrra fyrir henni. Málfrelsi og skoðanafrelsi er á Íslandi er það ekki annars? Skilja ekki ráðamenn þjóðarinnar að fólk er reitt, eigum við bara að sitja og sætta okkur við þetta....?

Sjúlli kveður mjög ánægður með Katrínu Odds 

Ræða Katrínar ekki tekin út

Ef ég væri lítil fluga

ég inn um gluggann þreytti flugið mitt. Jáhá skáldlegur skal maður vera. Er í tiltölulega góðu skapi núna, var að klára og skila lokaverkefninu mínu í stjórnun en ég skrifaði um mannauðsstjórnun. Síðan átti ég eftir annað verkefni í stjórnun en það var lítið og létt og það er farið líka og ég er svo dugleg:)

Var nú aldeilis ekki svona glaðlega í morgun, fékk skitu kl 7.40 þokkaleg tímasetning var á leið út um dyrnar OHHHHH. En út um dyrnar fór ég og keyrði hratt upp í vinnu og þaut á milli skjólstæðinga minna og skaust á klósett hér og þar. Þurfti svo að fara upp á FSA til að læra á einhverjar græjur sem einn skjólstæðingurinn minn var að fá og mikið ofsalega varð ég glöð þegar ég sá klósett. Ekki eðlilegt. Hélt svo að þetta væri bara búið og fór og skokkaði í Vaxtarræktinni með Kamillu, var varla komin út þegar allt skall á með krafti aftur, nottlega bara hrist þetta allt niður. Þannig að dagurinn í dag búinn að vera pínu strembinn, þegar ég hætti loks að drulla, varð mér óglatt en ældi ekki, fékk svo beinverki og þvílíkan hausverk en er öll að koma til eftir að hafa gúllað í mig Paratabs. Já það er nauðsynlegt að fólk viti smáatriðin:)

Annaðkvöld ætla báðar stöðvarnar í heimahjúkrun að hittast á okkar stöð, hlusta á jólatónlist, kertaljós, baka smákökur til að fá smá ilm og fá okkur kaffi saman og spjalla verður bara gaman. Eigum að kynna líka verkefni sem við höfum verið að vinna að svona samvinnu/jákvæðni verkefni og mér fannst það svo gaman:)

Ég held ég hafi ekkert meira að segja er að hugsa um að drullast inn í rúm og sofa aðeins, var búin að heita því að fara að sofa um kl 9 en eitthvað klikkaði það enda væri ég ekki búin með verkefnin mín þá. 

Sjúlli kveður alveg ofsakátur 

Honey I´m home

Allt skemmtilegt tekur enda að lokum. Þessi ferð var bara skemmtileg með tilheyrandi veseni og fleiru haha. Ekkert alvarlegt samt, villtumst bara með tonn af innkaupapokum bara snilld vorum búnar að þræða íbúðahverfin í Dublin fram og tilbaka í leit að lestinni Luas en hún fannst fyrir rest með hjálp góðhjartaðrar konu sem leist held ég ekkert á þessar þrjár kvensniftir sem voru að niðurlotum komnar með fullt af pokum merkt H&M, Penney´s, Next ofl.

Írar eru upp til hópa agalega kurteisir og hjálpsamir og nægjusamir og skemmtilegir en það er vondur matur þarna og ég var ekki lengi að átta mig á því. Pöntuðum okkur ekta írskan morgunverð einn daginn, samanstóð af ógeðslegri skinkusneið, hrærðum eggjum, kartöfluklessu, ristuðu brauði og black pudding sem er einhver þjóðarréttur þeirra og bragðast viðurstyggilega en það er svona svipað og slátur í útliti bara minna JAKK. Ég ákvað nú að kaupa sýnishorn af black and white pudding og færa Eyþóri og hann snæðir þetta eflaust með bestu lyst þegar hann fer í það.

Annars vorum við mest í að versla, sem er reyndar frekar dýrt en vorum svo heppnar að finna Penney´s sem er mjög stór verslun í verslunarmiðstöðinni Dundrum. Þar keypti ég helling af fötum á Kötlu, mig og Eyþór á kúk og kanil. Brynja verslaði sér líka helling og jólagjafir handa öllum vinkonum og vinum held ég. Vorum mest hræddar við yfirvigt á leið heim en það slapp til þrátt fyrir að ein þyrfti hreinlega að hoppa ofaná töskunni til að geta lokað henni nefnum engin nöfn Hildur er það nokkuð.

En eftir ömurlega flugferð í algerlega loftlausri leiguflugvél frá bresku flugfélagi lentum við um kl 19 og vorum svo komnar heim um kl 3 í nótt það var ósköp gott að detta upp í rúmið enda vakti lítill stubbur mig snemma og fékk svo að vera heima í dag:) 

Þýðir ekkert að hanga hér, á að vera að skrifa ritgerð um mannauð en ætla bara að fara að sofa enda vinna í fyrramálið og svo þetta venjulega eftir það. Skrifa meira seinna.

Sjúlli kveður gúdd næd 

Dublin here I come

Jæja á morgun leggjum við af stað til Dyflinnar, förum um kl 18 héðan á trukknum hennar Hildar og gistum svo hjá Bjarti frænda í Gyðufellinu og svo bara á fimmtudagsmorgun kviss, bamm, bumm mæting kl 09.00 jebba hlökkum allar verulega til held ég.. Það held ég nú..

Búin að vera rosa dugleg í dag, kláraði að setja upp lokaverkefnið okkar Huldu í hjúkrun og sendi það nú undir kvöldið þannig að það er frá. Prentaði út helling af heimildum fyrir lokaverkefnið mitt í stjórnun sem á að vera um þekkingarstjórnun og þekkingarverðmæti. Prentaði líka út öll verkefni sem ég hef unnið í vetur í hjúkrun þannig að það er bara allt að verða klárt til að lesa fyrir próf en á því byrjar maður um leið og letilífinu lýkur í Dublin. Síðan rauk ég í að baka eins og eina sort af smákökum, og steikti slurk af fiskibollum handa karli föður mínum til að eiga í kistunni, er alls ekki að borða nógu fjölbreytt fæði kallinn þannig að maður laumar svona að honum endrum og eins:) 

Annars er ég búin að vera með Kötlu heima bæði i gær og í dag, var með um 39°C á sunnudagskvöldið og hundlasin í gær en svo bara búin að vera spræk í dag, vildi bara hafa hana hitalausa heima einn dag því á dagheimilinu geta þau ekki fengið að vera inni eins og á leikskólum, hlakka til þegar hún fer á leikskóla.

Hvað á ég að tuða meira, jú fékk sjokk í dag þegar ég fékk greiðsluyfirlit frá greiðsluþjónustunni og sá hvað ég á að borga á næstu mánuðum, vá hvað lánin hafa hækkað, spurning um að leita sér að íbúð bara í Dyflinni og flytja til Írlands já eða Færeyja eða Danmerkur já eða Svíþjóðar. Bara lengst í burtu frá þessu bulli öllu saman svei mér þá. Dabbi Odds er drullupeli og ég segi það og stend við það og allt þetta helvítis pakk sem stjórnar þarna.

Jæja ætla að fara að leggja mig fljótlega nema ég detti í að lesa heimildirnar mínar um þekkingastjórnun, almáttugur veit ekkert hvað ég er að fara úti en kemst líklega fljótt að því, fékk frest til 28 nóv að skila áttum að skila 25 nóv getur vel verið að ég nái því og þá er það bara bónus.

Sjúlli kveður á leið til Dyflinnar  

Úr ýmsum áttum

Bloggaði einhvern tímann hérna á síðunni um veitingastað sem ég fór á og tjáði að mér hefði fundist þjónustan og maturinn hræðilegur. Tæp tvö ár síðan og núna fær kallinn minn skammir frá eiganda staðsins fyrir að skíta staðinn út eða eitthvað...haha mér finnst þetta fyndið, í fyrsta lagi ég skrifaði þetta og í öðru lagi það eru tvö ár síðan jahérna hvað fólk hlýtur að vera tæpt á þessum síðustu og verstu:)

Er að fara að læra en ákvað aðeins að munnræpast hér áður. Brynja er farin á gistikvöld í Hamri með Þórsurum og Eyþór er að gera eitthvað I don´t know ekki heima allavega. Gunný og Nonni komu í dag og voru á maraþonferð, stoppuðu í stutta stund og ruku svo tilbaka. Svona er þetta alltaf nóg að gera hjá fólki.

Brynja fer í næstu viku með skólanum að skoða MA en missir af kynningunni á VMA því við verðum úti, heyrist samt á henni að hún sé búin að ákveða sig í hvaða skóla hún ætli og það sé s.s. MA er alveg sátt við það MA góður skóli með mikið félagslíf þannig að það er fínt. Stendur sig enn alltaf jafn vel í skólanum. Hef oft hugsað hvað ég er heppin með það, ég hef aldrei þurft að neyða hana til að læra eða liggur við hjálpa henni neitt, hefur alltaf legið ljóst fyrir henni, alltaf verið með einkunnir 10,9 liggur við, reyndar er enskan að hræða hana núna en hún er meiri raungreinamanneskja en tungumála en samt alltaf fengið góðar einkunnir í þeim líka. Nóg af monti. 

Ég fer að vinna í fyrramálið og þarf að sækja Brynju upp í Hamar áður til að passa, Eyþór ætlar í rjúpur með Mása bró og vona að þeir fái bara helling og málið er dautt. Kíkti aðeins á pabba áðan, tók blóðþrýsting hjá kallinum, búinn að vera með svo mikinn höfuðverk og auðvitað alltof hár í tensio,  þarf að fara aftur á morgun, eins gott að hann á tvær dætur aðra hjúkku og hina sjúkraliða:) En annars bara sprækur að öðru leyti ætla að demba á hann sore no more á morgun og athuga hvort það lagi eitthvða höfuðverkinn:)

Ætla að fara á morgun eftir vinnu upp í Kjarna að týna köngla og síðan í mótmælagöngu hér á Akureyri og loks að sjá kveikt á jólatrénu á Glerártorgi. Katla er að uppgötva hvað jólin eru mögnuð, allt þetta jólaskraut og ljós voða spennandi. Hleypur fram á morgnana til að athuga hvort ekki sé örugglega jólaljós í eldhúsglugganum ennþá og tekur alveg andvarp þegar hún sér kveikt á því. Fyndið þetta litla stýri.

Best að hætta að rugla hér næ ekki prófum með þessu áframhaldi

Sjúlli kveður í lærdómshug 

My middlename is Bjútí

Verður maður ekki að vera ánægður með sjálfan sig tja. Skellti mér í litun og plokkun í dag, og svo núna áðan fórum við mæðgur í ljós (ég veit krabbavaldandi en hvað er ekki orðið það í dag) maður má ekkert sem er gott þá er eitthvað pottþétt óhollt við það. Sit núna og gúlla í mig skyri var svo svöng.

Á morgun er Bubbakot lokað þannig að Eyþór verður heima með skottið, ætlaði reyndar í rjúpur en það er svona. Ég fer bara í mína vinnu og er svo að vinna um helgina. Um þetta leyti eftir viku er ég komin til Dublin og er að ræða við Íra um efnahagsmálin á Íslandi múhaha með einn dökkan (pepsi max sko fyrir þá sem vita ekki að ég drekk ekki áfengi).

Pantaði ljósakross á leiðið hennar mömmu í dag, verður gaman að koma í garðinn þegar hann verður allur orðinn upplýstur af ljósakrossum. Systur og Hilla komu í heimsókn seinnipartinn og þær fóru svo til pabba síns en Hilla bauð okkur öllum mæðgum á Glerártorg og þar var verið að skreyta og svona stemmari að komast í gang. Keypti mér eina kúlu marglita ofsalega fallega og setti i eldhúsgluggann minn en ég setti jólagardínurnar upp í fyrradag, var að þrífa gluggana og ákvað að láta bara gossa:) Er aðeins að komast í jólagírinn en það gengur frekar hægt, ef eðlilegt væri þá væri ég orðin að jólasveini en líklega verð ég bara jóladvergur í ár

Á ég að segja eitthvað meira....nei hélt ekki þannig að ég ætla að fara að horfa á Mr. Bond, James Bond sem er að byrja á channel 2 úff farin að tala útlenskuna svona liggur við eins og mitt annað tungumál meira að segja með írskum hreim skal segja ykkur það

Sjúlli kveður sweet dreams everyone

My mouth is open

Hi my name is Dubbý:) Þetta s.s. er einn skjólstæðingurinn minn farinn að kalla mig af því að ég er að fara til Dublin og honum finnst það ógurlega fyndið því öllum er illa við íslendinga. Komumst svo reyndar að því að það er kvikindi í Harry Potter sem er kallaður þessu fallega nafni haha:) Ég ætla að vera Dani eða færeyingur í Dublin verst að ég er arfaslök í dönsku:)

Annars er ég að baka marengs (það er víst skrifað með "g" búin að gúggla það) og ég hef aldrei verið góð í að baka marengs hvað þá að skreyta kökur my gad, en það er s.s. foreldraviðtöl hjá Brynju á morgun og svo kaffihlaðborð sem er fjáröflun fyrir þau s.s. 10 bekk og ég átti að koma með tvær marengs. Jajá svo er ég að læra á milli þess sem ég skondrast til að sletta rjóma og rommkúlum á þetta dót:) Hentist í sturtu á 180 km hraða áðan skaust svo út úr sturtunni og fattaði þegar ég var að byrja að þurrka mér að það er víst betra að skola sjampóinu úr díses maður er þokkalega að verða vitlaus jamms.

Mikið að læra mikið mikið að læra og ég er komin með valkvíða á hvaða verkefni ég á að taka fyrir næst, ég er að vinna næstu helgi og svo fer ég suður á miðvikudag og læri þá ekkert meira líklega fyrr en á þriðjudag, væri fullgróft held ég að taka allar möppurnar með mér, yrði allavega ekki vel liðin af samferðakonum mínum jahérna. Þar sem allt er svo dýrt gæti nú verið gaman að eiga stund á hótelherbergi í Dublin og læra tilbreyting

Fór að hugsa í morgun um stöðu mála á Íslandi og ég hreinlega sé Ísland fyrir mér eins og Rússland fyrir nokkrum árum síðan, allt grátt og ömurlegt, reykstrompar púandi og við sjáum ekki út fyrir mengun...oj og við endum aftur í  moldarkofum á meðan ríku durgarnir sem komu okkur í þetta, eru á sólarströnd berrassaðir að drekka viskí...vona að það standi í þeim og þeir fái drullu sem endist þeim ævina.

Hvað á ég að bulla meira, tja kannski bara ekkert þar sem ofninn er farinn að hvína og marengs druslan er tilbúin og ég næ henni ábyggilega ekki úr forminu eins og hinni, en rjómi skal á engu að síður og hananú

Sjúlli kveður á útopnu 

Fleiri ættu að taka hann til fyrirmyndar

Væri ekki ráðlegt að fleiri myndu taka Bjarna til fyrirmyndar, og það menn sem hafa kannski gert meira af sér en að senda tölvupóst þó svo að það sé langt frá þvi að vera afsakanlegt. Væri fínt kannski að Davíð myndi taka dótið sitt og fara síðan gæti Geir og co fylgt á eftir og svo mætti eflaust lengi telja. Skil ekki hvernig menn geta komist upp með að gera endalaust eitthvað af sér en sitja samt áfram eins og kóngar í ríki sínu...og hananú sagði hænan

Sjúlli kveður alveg bit

Guðni: Bjarni axlar ábyrgð

Allt og ekkert

Sit hér með kertaljós, jólalag með Celine Dion og var að klára skilaverkefni í hjúkrun um byltur aldraðra. Þá er næst á dagskrá að henda sér í að gera eitthvað í lokaverkefninu í hjúkrun. Held að við séum nú á mjög góðri leið með það.

Eyþór og Brynja eru bæði úti, Eyþór að spila með stúlknakórnum heyrist hann nú samt vera að koma en Brynja fór í bíó með 4 vinkonum sínum. Litla grjónið sefur eins og hún á að gera eftir að hafa verið í miklu banastuði í kvöld.  Svo fer hann í Skagafjörðinn á morgun að halda tónleika með Óskari Pé og svo að spila í tveimur messum þannig að á morgun verður hann tja líklega ekki heima haha. Sé hann annaðkvöld bara. Fékk fullt af góðum gjöfum í dag, pabbi rambaði inn með köku og Hilla og dætur komu og færðu mér ýmislegt fallegt, svo sem kerti og viskastykki sem Hildur var búin að bródera aðeins í og ýmislegt fleira, auk þess sem ég var búin að fá frá þeim vindgalla fá 66°norður, krem frá Elínu sys, frá eiginmanninum og dætrum fékk ég nýja diskinn hans Bubba með stórsveitinni (elska Bubba), Myrká eftir Arnald, aðra bók man ekki hvað hún heitir og svo gjafabréf upp á 10 þús í jöru eða Abaco snyrtidæmi:) Agalega sæl með mig bara. Búin að fá fullt af góðum kveðjum líka takk fyrir það allir saman. Orðin 36 ára hundgömul. Verð alltaf pínu þunglynd á afmælinu mínu eldist allt of hratt, finnst svo stutt síðan ég var 16 ára að gera mömmu og pabba lífið leitt ójá var ekki einn af þessum yndislegu unglingum onei vandræðagepill:) En ég er alls ekki eldri en tvítug þannig séð, en svo kíkir maður í spegil og jú svei mér komin eitthvað yfir tvítugt

Er orðið frekar bumbult eftir allt gramslið í dag, konfekt, köku og svo eldaði Eyþór lambalæri sem einn nemandinn hans skildi eftir hér á tröppunum hjá okkur:) jájá

Ætla að leggjast á meltuna

Sjúlli kveður gamall